Biografi Sunda

Mohamad Alfath Prasastiawan

Jawara Sajak Ti SMANDA Tasikmalaya

Saha jalmina siswa sareng siswi SMA Negeri 2 Tasikmalaya anu teu wawuh atanapi teu uninga ka salah sahiji jawara lomba kasenian di Tasikmalaya. Rumaja putra,nu mindeng jadi pinunjul dina pirang-pirang cabang kasenian. Boh dina budaya sunda,boh dina sastra bahasa, ngarana geus tangtu moal di tatanyakeun deui. Anjeuna,Mohamad Alfath Prasastiawan.

Mohamad Alfath Prasastiawan atawa anu leuwih akrab di nénéh a Alfath ku adi kelasna téh pituin urang sunda. Anjeuna lahir di Tasikmalaya,tanggal 21 September 1995. Anak cikal ti dua sadulur ieu téh,mangrupa salah sahiji conto siswa pinunjul di sakolana. Lanceuk teges M. Azhar H,putra bapak Drs Darusman sareng ibu Tita Sanita. A Alfath ngamimitian pendidikan formalna di TK PUI taun 2000 dugi ka 2002. Teras sakola di SD N Sukasari 1 dugi ka taun 2008. Ti budak kénéh,émang bakat senina a Alfath tos katémbong. Mimiti resep ngiringan lomba-lomba model di TK,tur lomba sajak ti kelas 2 SD.

Munggaran ngiringan lomba sajak,anjeuna tos janten jawara harapan 2 antar sakola. Sabot harita,a Alfath mimiti leukeun di ajar maca sajak sareng ramana. Sababaraha kali a Alfath kantos janten pinunjul tina lomba sajak. Waktos kelas 4 SD waé,a Alfath tiasa janten wawakil kota Tasikmalaya pikeun lomba sajak di tingkat propinsi. Sanajan ngan saukur jadi jawara 2,anjeuna tetep sumanget tur terus ningkatkeun prestasina dina maca sajak.

Saentos lulus ti SD N Sukasari 1,a Alfath neraskeun sakolana ka SMP N 1 Tasikmalaya. Salah sahiji SMP favorit di kota kalahiranna. 3 taun sakola di Nesata,anjeuna teu weléh nyeungitkeun tur ngangkat ngaran Tasikmalaya di tingkat propinsi. Lian ti lomba sajak,getih seni a Alfath terus ngalir tur ngembang kana bakat nu liana. Salah sahijina nyaeta Beat Box.

Beat Box nyaeta salah sahiji budaya bangsa deungeun anu ayeuna-ayeuna keur jadi minat anyar para rumaja di Indonesia. A Alfath salah sahijina,lain ukur reresepan,anjeuna bener-bener leukeun tur titén dina nungkulan ieu kasenian deungeun. Buktina a Alfath kantos janten jawara ka 3 lomba Beat Box tingkat kota waktos SMP.

Sanajan kitu,cintana kana budaya sunda khususna sajak teu kalélédkeun. 3 taun di SMP,a Alfath teras neraskeun nyiar elmuna di SMA Negeri 2 Tasikmalaya (SMANDA). Di sakola ieu ayeuna a Alfath napak nincak nyiar elmu pikeun bekeul jaga. Salian ti unggul dina bidang seni, a Alfath ge salah sahiji siswa anu nyongcolang dina pelajaran akademik. Anjeuna nempatan ranking ka 13 tina 800 leuwih siswa anu daftar ka SMA Negeri 2 Tasikmalaya.

Mimiti asup ka SMA waé anjeuna tos nyumbangkeun piala jawara ka 2 maca sajak tingkat kota taun 2012. Di taun eta kénéh, a Alfath janten jawara ka 4 lomba Beat Box se-Indonesia via online. Ieu salah sawios buktos yen teu aya anu muhal di dunya ieu salila urang keyeng tur yakin kumaha waé carana urang pasti bisa. Heunteu dugi kadinya,taun 2013 a Alfath ngukir deui prestasi gumilang dina seni sajak. Anjeuna janten jawara ka 1 lomba maca sajak tingkat kota. Teras janten juara ka 2 maca sajak dina Gema Ramadhan taun 2013.

Ayeuna,anjeuna tos kelas XII SMA. Cita-citana tangtu heunteu tur moal rengse dugi kadinya. A Alfath masih keneh nyimpen mangrebu harepan pikeun tiasa ngabungahkeun ibu ramana ku jalaran maca sajak. Salah sawios sajak anu janten kasukaannana teh nyaeta sajak sunda anu judulna “Doa”. Saurna maca sajak téh ulah ngan saukur butuh ku sajakna,tapi eusina. Urang kudu bener-bener ngarti kana makna tur kandungan éta sajak. Salah sawios sajak karya a Alfath nyaeta sajak anu judulna “Bapakmu penghalang cinta kita”. Ieu sajak kantos dibacakeun di payuneun réréncangannana waktos MOPD di SMANDA.

Saentos engke lulus ti SMA,anjeuna insyaalloh neraskeun pendidikannana ka salah sawios Universitas di Jawa. Anjeuna tos kenging beasiswa anu ngajamin pendidikannana ka payun. A Alfath gaduh cita cita pikeun janten komunikator handal di Indonesia. Kasuksesan a Alfath salami ieu teu ujug-ujug. Tangtu aya heula prosesna,usaha anu keyeng tur doa ti ibu ramana anu terus ngocor.

Saurna keneh,kunaon a Alfath milih seni sajak,lantaran sajak téh lir ibarat olah raga bari curhat. Mantak ngesang cenah. Koncina,lamun urang hayang sukses,urang kudu wani beda tinu lian. Ulah sakali-kali minder komo nurutan gaya batur mah. Urang kudu tetep jadi diri sorangan jeung percaya kana kamampuan diri urang. Milampah dunya kasenian tangtu heunteu mulus wae,pasti aya galitukna. Sababaraha kali a Alfath kantos gagal tur hanjakal. Tapi ku niat anu bener-bener jeung yakin kana kamampuan dirina,a Alfath tiasa neraskeun lalampahannana dina maca sajak.

Salian ti janten komunikator handal Indonesia,a Alfath oge gaduh cita-cita pikeun ngabangun sakola sajak di Tasikmalaya. Anjeuna hoyong seni sajak terus turun-tumurun ka anak incu urang sunda. Saurna,budaya sunda lain ngan saukur seni,tapi oge amanat. Amanat anu tetep kudu di riksa tur dipiara ku urang sunda. Urang ulah gengsi,komo deui poho kana ciri jeung identitas urang sunda,utamana sajak.

Mohamad Alfath Prasastiawan nyaeta a Alfath tea,ngaran anjeuna anu nyeungitkeun ngaran kulawargana. Ngaran anjeuna anu nyeungitkeun ngaran sakolana. Ngaran anjeuna oge anu nyeungitkeun ngaran lemah caina. Malah ngaran anjeuna kantos nyandak ngaran nagara urang ka Sinngapore pikeun lomba Beat Box harita. Moal lilia ti ayeuna,urang salaku kulawarga SMA Negeri 2 Tasikmalaya bakal ditinggalkeun ku sang jawara sajak. 3 taun anjeuna nyiar elmu di SMANDA. 3 taun oge anjeuna nyumbang katineung-katineung anu ngareueuskeun sakola urang .

Mugia kapayuna,herang ngaran Mohamad Alfath Prasastiawan bakal leuwih nyongcolang. Cita-citana ngawujud,tur anjeuna terus jadi maestro sajak dimana wae lengkahna napak. Seungitna ngaran a Alfath,ngagunungna prestasi a Alfath, mugia sing jadi conto pikeun urang-urang sangkan bisa mekarkeun jawara-jawara liana anu siga tur leuwih seungit ngarana tibatan Mohmad Afath Prasastiawan.

PANCÉN BASA SUNDA

BIOGRAFI

MOHAMAD ALFATH PRASASTIAWAN

                Diajengkeun kanggo salah sahiji pancén Basa Sunda.

 

 

Kelas : X-3 MIA

Wasta :  Dwi Rahmi

   Lilis Ratna Sari

               Pamelia Nur Dewi M

               Salsabila

SMAN 2 Tasikmalaya

Jl. R.E Martadinata No. 261 Telp/Fax: (0265) 331331

                        Website: http://www.sman2-tsm.sch.id

                             Kota Tasikmalaya - Jawa Barat